नेपालभाषाया निपु म्यूजिक भिडियो छक्वलं सार्वजनिक जूगु दु ।

ख्वपय् जूगु छगू ज्याझ्वलय् यमन श्रेष्ठं हालादीगु म्ये ‘यःमां जितः ब्याहा यानाब्यु’ व म्येहालामिसुरजबीर बज्राचार्यया ‘का रे मयजु’ या म्यूजिक भिडियो सार्वजनिक जूगु खः ।

ज्याझ्वलय् वरिष्ठ संकिपाकःमि नीर शाहं निगुलिं म्यूजिक भिडियो सार्वजनिक यानादीगु खः ।

म्यूजिक भिडियो सार्वजनिक यायेधुंकाः ज्याझ्वलय् न्वयायेगु झ्वलय् वरिष्ठ संकिपाकःमि शाहं नेपालभाषाया म्यूजिक भिडियोलय् मौलिकता न्ह्यब्वयेत छ्याता बियादिल ।

नेवाः समुदाय मूर्त अमूर्त सम्पदा, संस्कृतिया तःमि जूगुलिं थःगु हे समाजया मौलिकतां संकिपा वा म्यूजिक भिडियोयात उत्कृष्ट दयेकेफइगु शाहया सुझाव खः ।

‘नेवाः समुदाय थः हे छगू जीवन्त संस्कृति, सम्पदा खः । कृतिमता आवश्यक हे मजू । थःगु हे समुदायया मौलिकतां नेवाः संकिपा वा म्यूजिक भिडियोयात उत्कृष्ट व सम्पन्न दयेकेफइ’ शाहया धापू खः ।

संगीत व संकिपाया माध्यमं नेवाः सभ्यता न्हू पुस्ताय् पुस्तान्तरण याये फइगुलिइ शाहं बः बियादिल ।

सार्वजनिक जूगु निगू म्यूजिक भिडियोमध्ये यमनया ‘यःमां जितः ब्याहा यानाब्यु’ या म्येग्वः च्वयेगुलिसें लसय् हनेगु ज्या कृष्णभक्त महर्जनं यानादीगु दु ।

म्यूजिक भिडियोया निर्देशन राजन शाहीं यानादीगु दु । रुपेन श्रेष्ठ ‘थक्वाःमि’, कृष्णभक्त महर्जन, अनिता ताम्राकारलिसेंया कलाकारं अभिनय यानादीगु दु । ग्रेटर नेपाल इन्टरटेनमेन्ट युट्युब च्यानलमार्फत म्यूजिक भिडियो सार्वजनिक जूगु दु ।

मेगु म्यूजिक भिडियो ‘कारे मयजु’ या निर्देशन बाल मुकुन्द प्रजापतिं यानादीगु दुसा रविता बाके, सीताराम माकः, महेश हाडा लिसेंया कलाकारं अभिनय यानादीगु दु । गायक बज्राचार्यं च्वयादीगु म्येय् संगीत सुरज ब्यन्जनकारया दु ।

निपुं म्येया छायाङ्कन व दृश्य सम्पादन बाल कुमार व अनिल मगरं यानादीगु दु ।

उगु हे ज्याझ्वलय् नेपालभाषाया न्हूगु संकिपा धर्मलक्ष्मीया प्रमो नं सार्वजनिक याःगु खः ।