उपप्रधान लिसें स्वास्थ्य तथा जनसंख्या मन्त्री उपेन्द्र यादवं मिसात न्ह्याःमवंकं समाज न्ह्याःवने मफइगु खँय् बः बियादीगु दु ।

नेवाः पत्रकार राष्ट्रिय दबुलिं येँय् याःगु ज्याझ्वलय् न्ववासें स्वास्थ्यमन्त्री यादवं परिवार, समाजयात बांलाःगु लँय् न्ह्याःवनेगु शिक्षा मिसां हे बीफइगु जूगुलिं समाजया विकास यायेत मिसातय् हे विकास जुइमाःगु धयादीगु खः ।

पत्रकार राष्ट्रिय दबुलिं ११४क्वःगु महिला दिवसया लसताय् क्रियाशिल महिला पत्रकारतयत साधना मिसा पत्रकारिता सम्मान ज्याझ्वः याःगु खः ।

ज्याझ्वलय् मन्त्री यादवं खुम्ह क्रियाशिल मिसा पत्रकारतयत सम्मान लःल्हानादीगु खः ।

गोरखापत्र न्हिपौया यलु जोशी, नेपाल समाचारपत्रया भगवती तिमल्सिना, नेपाल टेलिभिजनया पवन वर्षा शाह, मेट्रो एफ एमया रिता महर्जन, नयाँ पत्रिकाया शान्ति तामाङ व स्वतन्त्र फोटो पत्रकार सुनी बनेपालीयात सम्मान याःगु खः ।

ज्याझ्वलय् न्ववावसें उपप्रधानमन्त्री यादवं मिसा पत्रकारत पत्रकारिता क्षेत्रय् जक मखसें हरेक क्षेत्रय् सम्मान यायेबहःजूगु बिचाः तयादिल ।

साधना मिसा पत्रकारिता सम्मानया थ्व च्यागूगु संस्करण खः । उगु हे ज्याझ्वलय् दबूया स्वलापौ ‘आज्जु’या नं उपप्रधान मन्त्री यादवं बिमोचन यानादीगु खः ।

दबूूया केन्द्रिय नायः गलत इतिहासयात भिंकाः वास्तविक इतिहास स्थापित यायेत दबुलिं संघर्ष यानाच्वंगु व गलती मभिंकूतल्ले थःपिं सुम्क मच्वनेगु उद्घोष नं नायः श्रेष्ठं यानादिल ।

दबूया ल्यू छ्यान्जे लिसें ज्याझ्वः कजि सुनिता महर्जन, न्वकू रचना श्रेष्ठं दबूया गतिविधि, ज्याझ्वःया उद्देश्य आदिया बारे न्ववानादिल ।

दबूया निवर्तमान नायः सुरजबीर बज्राचार्य, कानूनी सल्लाहकार किरण शाक्य, केन्द्रिय सल्लाहकार विजयरत्न असंबरे, दबूया यल कचा नायः मन्जु बज्राचार्यलिसें नं नुगःखँ तयादीगु खः ।