‘सम्झी सम्झी’, ‘माया गर’ लिसेंया म्येत हालाः छगू इलय् नांजाःम्ह म्येहालामि प्रवीन चन्द्र बज्राचार्यया न्हूगु नेवाः म्येया म्यूजिक भिडियो पिदंगु दु ।

डग लभर म्येहालामि रुपं नं म्हसीका दयेकेत ताःलाःम्ह बज्राचार्यया म्ये ‘आः जिं छु याये यःमां’या म्युजिक भिडियो सार्वजनिक जूगु खः ।

वंगु बुधबाः श्रीपन्चमीया दिनय् येँय् जूगु छगू ज्याझ्वःया दथुइ वरिष्ठ म्येहालामि जुजुकाजी रंजितं म्येया म्यूजिक भिडियो सार्वजनिक यानादिल ।

ज्याझ्वलय् न्ववासें वरिष्ठ म्येहालामि रंजितं थौंकन्हय् न्हून्हूगु सवाःया नेवाः म्येत धमाधम पिदनाच्वंगु धासें लसता प्वंकादिल ।

ज्याझ्वलय् नेवाः टिभिया प्रमुख नवीन जोशी, सन्चारकःमि दर्शनवीर शाक्य व वरिष्ठ सिने पत्रकार विजयरत्न असंबरे लिसेंया उपस्थिती दुगु खः ।

नेवाः कला क्षेत्रया हास्यव्यङ्ग ख्यलय् बागः दाई (समयबजि) या नामं नांजाःम्ह सुरेन्द्र मानन्धरं म्येग्वः च्वयेगुलिसें म्यूजिक भिडियोया निर्देशन व अभिनय नं यानादीगु द । म्येयात दिपेश सिंह व आकाश महर्जनं लसय् चिनादीगु दु ।

म्यूजिक भिडियोलय् मानन्धरलिसें रबिता बके श्रेष्ठ, सरस्वती मानन्धर, ध्रुब कपाली, सुरेश मानन्धर व गायक बज्राचार्य, संगीतकार दिपेश सिंहं नं अभिनय यानादीगु दु ।

म्यूजिक भिडियो निर्देशनया झ्वलय् शतक ल्याः लिक्क थ्यंम्ह निर्देशक मानन्धरया मेमेगु म्ये थें हे थ्व म्ये नं कमेडी जनराय् हे दु ।

ख्यालिलिसें म्यूजिक भिडियों इहिपा थुज्वःगु महत्वपुर्ण निर्णय यायेत बांलाक बिचाः यायेमाः धइगु हसना बीत स्वःगु दु ।