कन्हय् फेब्रुअरी २१ अर्थात अन्तर्राष्ट्रिय मातृभाषा दिवस । दिवसया झ्वलय् कन्हय् नेपालय् नं थीथी ज्याझ्वः जुइत्यंगु दु ।

थ्व हे झ्वलय् नेवाः पत्रकारतय् राष्ट्रिय संगठन नेवाः पत्रकार राष्ट्रिय दबुलिं नं मातृभाषा पत्रकारिता सम्वन्धि अन्तरक्रिया ज्याझ्वः यायेत्यंगु दु । दबूुलिं कन्हय् येँय् ‘मातृभाषा पत्रकारिताया महत्व’ विषयस अन्तरक्रिया ज्याझ्वः यायेत्यंगु खः ।

ज्याझ्वलय् नेपालभाषां प्रकाशन प्रसारणय् दुगु संचारमाध्यमया प्रतिनिधितयसं थःथःगु खँ तइगु दबुलिं न्ह्यथंगु दु ।

‘आः पत्रकारिताया परिभाषा व्यापक जुइधुंकल । नेपालभाषां न्ह्यानाच्वंगु पत्रपत्रिका, अनलाइन, रेडियो, टेलिभिजन आदि दक्वं माध्यमया प्रतिनिधितय् उपस्थितीइ थ्व अन्तरक्रिया ज्याझ्वः यायेत्यनागु खः’ पत्रकार राष्ट्रिय दबूया नायः नृपेन्द्रलाल श्रेष्ठं धयादिल ।

मातृभाषा पत्रकारिता शताब्दी दिवसया तयारी कथं नं थ्व ज्याझ्वः यायेत्यनागु नायः श्रेष्ठं धयादिल ।

थनिं ९९ दँ न्ह्यः ने.सं. १०४५य् धर्मादित्य धर्माचार्यं नेपालभाषाया पत्रिका ‘बुद्धधर्म’ पिथनादीगु खः । थ्व हे पत्रिका नेपालया न्हापांगु मातृभाषी पत्रिका कथं कयातःगु दु ।

आः नेपालय् मातृभाषा पत्रकारिताया सुरुवात जूगु सछि दँ पूवनेत्यंगु झ्वलय् पत्रकार दबुलिं मातृभाषा पत्रकारिता शताब्दी दिवस हनेगु तयारी यानाच्वंगु दु ।