जोशी समाज येँ जिल्लाया आःया कार्यकालया नेतृत्व बीरेन्द्र कुमार जोशीं याइगु जूगु दु ।

जोशी समाज येँ जिल्लाया शनिबाः किपुलिइ क्वचाःगु दँ मुँज्यालिसें च्याक्वःगु तःमुँज्यां बीरेन्द्र कुमारयात समितिया न्हूम्ह नायः ल्यःगु खः ।

सर्वसम्मत ल्यःगु ११ दुजःया न्हूगु ज्यासना पुचलय् न्हापांम्ह न्वकू बिन्दु प्रकाश जोशी व न्वकू पदय् सनम श्रेष्ठ जोशी ल्यःगु दु । छ्यान्जेया भाला शरद मङ्गल जोशीयात ब्यूबलय् ल्यू छ्यान्जेय् एलिना प्रधान जोशी वःगु दु ।

अथे हे दांभरिं पदय् बिष्णु मान जोशी व ल्यू दांभरिं पदय् रमेश कुमार जोशी नं सर्वसम्मत निर्वाचित जूगु दु ।

ज्यासना पुचःया प्यम्ह दुजलय् ध्रुव मान जोशी, शर्मिला राजभण्डारी जोशी, कबिन्द्र जोशी व शुभेन्द्र लाल जोशी ल्यःगु दु ।

वयां न्ह्यः तःमुँज्याया उलेज्या सत्रय् न्ववासें समाजया केन्द्रीय नायः ज्ञानेशमान जोशीं जोशीतय्सं थःगु जातप्रति गर्व तायेकेमाःगु धयादिल । राजोपाध्याय द्यःब्रह्मू, आचाःजु व जोशीत त्रिदेव थें जुयाः नेवाः संस्कार, संस्कृतिया संरक्षणय् न्ह्यज्यानाच्वंगु जोशीया दावी खः ।

नेवाः संस्कार संस्कृतिया नितिं भिंगु साइत स्वयेगु ज्या यानावःपिं जोशीतय्सं नेवाः संस्कृतिया संरक्षण, सम्वर्ध्दनय् तःधंगु योगदान बियावःगु जोशीया धापू खः । दँय्दसं स्वन्तिइ तिथिया विवाद खनेदइगु इलय् सकसिनं जोशीतय्गुपाखें समस्याया समाधान वइगु आशा यानाच्वंगु जोशीं धयादिल ।

‘तिथिया विवाद जुलकि सकसिनं जोशीतय्के न्यनेगु का धाइ । अज्याःगु अवस्थाय् झीसं दँय्दसं वयाच्वंगु तिथि विवाद ज्यंके मफयाच्वंगु खनेदयाच्वन । झीगु पुलांगु संस्कृति, परम्परायात लुमंकाः न्ह्याःवंसा छुं हे समस्या जुइमखु’ जोशीया धापू खः ।

ज्याझ्वलय् समाज येँ जिल्ला समितिया साविक नायः कमल बहादुर जोशी, केन्द्रीय मूछ्यान्जे कुशेश्वर प्रसाद जोशी, केन्द्रीय न्हापांम्ह न्वकू विन्दु प्रकाश जोशीलिसें नं जोशीत संगठित जुयाः सामूहिक हितय् न्ह्याःवनेमाःगु बिचाः तयादिल ।

तःमुँज्यां समितिया छ्यान्जे सनम जोशीया वार्षिक प्रतिवेदन व दांभरिं विष्णुमान जोशीया आर्थिक प्रतिवेदन पारित याःगु दु ।

उग हे ज्याझ्वलय् थीथी बिधाय् कजिया भाला कयाः ज्या पूवंकूपिं कार्य समितिया दुजःतयत सम्मान याःगु खः । अथेहे, १५०क्वः हिदान याःम्ह बिरेन्द्र कुमार जोशीयात बिशेष सम्मान याःगु खः ।