बालसाहित्य धेंधें बल्लाः कासाया त्याकामि विद्यार्थीतयत सिरपाः लःल्हात
eBukhan – ईबुखँ डेस्क, २०८१ आषाढ २०, बुधबार वर्गीकृत समाज
२३ वडाया पूर्व वडाध्यक्ष तकं खःम्ह वरिष्ठ बाल साहित्यकार शान्तदास मानन्धरया लुमन्तिइ जूगु बालसाहित्य धेंधें बल्लाः कासाया त्याकामि विद्यार्थीतयत सिरपाः लःल्हाःगु दु ।
येँ महानगरपालिका २३ वडाया ग्वसालय् जूगु महानगरब्यापी स्कूलस्तरीय च्वखँ अले चिनाखँ धेंधें बल्लाः कासाया त्याकामि विद्यार्थीतयत वंगु शनिबाः छगू ज्याझ्वः यासें सिरपाः लःल्हाःगु खः ।
ज्याझ्वलय् त्याकामि विद्यार्थीतयत येँ महानगरपालिकाया उपप्रमुख सुनिता डंगोलं दसिपौ लःल्हानादिलसा वडा २३ या वडाध्यक्ष मचाराजा महर्जनं तका सिरपाः लःल्हानादिल ।
कासाय् न्हाप, ल्यू, लियांल्यू व हःपाः सिरपाः त्याकूपिं विद्यार्थीतयत म्हतिं छसिकथं १०द्वः, ७द्वः, ५द्वः व १५सः तका सिरपाः ब्यूगु खः ।
ज्याझ्वलय् न्ववासें येँ मपा उपप्रमुख डंगोल, वडाअध्यक्ष महर्जनं भाषा, कला, साहित्यया संरक्षणया लागिं थुकियात भावी पुस्तायात लःल्हायेमाःगु व थुकिया हे कुतः कथं थुगु धेंधें बल्लाः कासा यानागु धयादिल ।
प्रमुख निर्णायक रमेशकाजी स्थापितं निर्णय प्रक्रियाबारे जानकारी ब्युसें त्याकामि विद्यार्थीतय् नां घोषणा यानादीगु खः ।
निर्णायक मण्डलया दुजः पूर्णिमा डंगोलं वरिष्ठ बाल साहित्यकार मानन्धरया जीवनीइ जः ह्वलादिल ।
धेंधें बल्लाः कासाबारे ज्याझ्वः कजि व वडा सदस्य सुरेश मानन्धरं जानकारी बियादिल ।
कक्षा ६, ७ व कक्षा ८, ९ यानाः निगू पुचलय् जूगु धेंधें बल्लाखय् कक्षा ८–९ पाखे च्वखँय् फ्युचरस्टार इंग्लिस सेकेन्डरी स्कूल, कक्षा ८ या श्रेया पराजुली न्हाप लात ।
अथेहे, विजेश्वरी ज्ञानमन्दिर सैनिक महाविद्यालय कक्षा ९ या प्रकृति चौहान ल्यू, श्री रत्नराज्य मावि, कक्षा ८ या सम्पदा थापा लियांल्यू लात सा जगतसुन्दर ब्वनेकुथि, कक्षा ९ या कजना श्रेष्ठं हःपाः सिरपाः त्याकादिल ।
अथेहे, चिनाखँपाखे ज्ञानोदय मावि, कक्षा ८ या सद्भाव ज्ञवाली न्हाप, कक्षा ९ या अनिश विष्ट ल्यू, श्री महांकाल मावि कक्षा ९ या अंजली गुप्ता लियांल्यू लातसा शान्ति निकुञ्ज मावि, कक्षा ९ या सविना न्यौपानें हःपाः सिरपाः त्याकल ।
कक्षा ६–७ पाखे च्वखँय् श्री महांकाल मावि कक्षा ७ या सपना श्रेष्ठ न्हाप, नेपाल युवक स्कुल कक्षा ६ या आएशा खातुन ल्यू, कन्या मन्दिर मावि, कक्षा ७ या करुणा नेपाल लियांल्यू व श्री जनकल्याण मावि कक्षा ६ या युवराज शाहं हःपाः सिरपाः ल्हातय् लाकल ।
चिनाखँपाखे जगतसुन्दर ब्वनेकुथि कक्षा ६ या निभा श्रेष्ठ न्हाप, श्री रत्नराज्य मावि कक्षा ७ या हिरा कुँवर ल्यू, कंकेश्वरी आधारभूत विद्यालय कक्षा ७ या बिल्कस खातुन लियांल्यू व शान्ति निकुञ्ज मावि कक्षा ६ या सुष्मा माझीं हःपाः सिरपाः त्याकल ।
धेंधें बल्लाः कासा कक्षा ६ व ७पाखे नेपालभाषां व कक्षा ८ व ९ पाखे नेपाली भाषां जूगु खः ।
