रन्जना लिपिया नित्या युनिकोड सार्वजनिक जूगु दु ।

थौं येँय् जूगु छगू ज्याझ्वःया दथुइ येँ महानगरपालिकाया उप प्रमुख सुनिता डंगोलं नित्या रन्जना युनिकोड सार्वजनिक यानादिल ।

ज्याझ्वलय् न्ववासें येँमपा उपप्रमुख डंगोलं रञ्जना लिपि थें मेगु पुलांगु लिपियागु नं संरक्षण याये आवश्यक दुगु धयादिल ।

क्यालिजात्रा फाउण्डेशन व भारतया फन्ट डिजाइन कम्पनी इके टाइपया सहकार्यय् रञ्जना युनिकोड नित्या विकास याःगु खः ।

नित्या रञ्जना युनिकोड हलिंन्यंक निःशुल्क छ्यलेफइगु फाउण्डेशनं न्ह्यथंगु दु ।

थुगु नित्या युनिकोडं सरकारी संस्था, नेवाः लिसें गैरनेवाः समुदाय, विद्यालय, कलेज, डिजाइन हाउस लाभान्वित जुइफइगु फाउन्डेसनया दाबी दु ।

फाउन्डेसनया नायः आनन्द कुमार महर्जनं म्हिगःया दिनय् डिजिटल लिपि उपलब्ध मजूगु अवस्थाय् लिपि छ्यःसां गलत स्क्रिप्ट च्वयाच्वंगु धयादिल ।

अथेजुयाः थुकियात भिंकाः आकर्षक ढङ्गं हलिंन्यंक छ्यलेजीक हयागु धयादिल ।

ज्याझ्वलय् रञ्जना लिपिबारे स्वर वर्ण, व्यञ्जन वर्ण व ल्याः गुकथं च्वयेगु धकाः रञ्जना लिपिइ टाइप यानाः क्यंगु खः ।

लिसें ज्याझ्वः जूगु थाय् आर्ट काउन्सिलय् रञ्जना आखलं च्वयातःगु हलंज्वलंया ब्वज्या नं याःगु खः ।