गायक हाडाया म्यूजिक भिडियोया छायाङ्कन काश्मिरय्ः भिडियोलिसें
eBukhan – विकाश राज, २०८० फाल्गुण ८, मंगलबार वर्गीकृत मनोरञ्जन

काश्मिरय् छायाङ्कन यानातःगु नेपाली म्यूजिक भिडियो सार्वजनिक जूगु दु ।
काश्मिरय् छायाङ्कन यानातःगु गायक रवि हाडाया म्ये ‘तिम्रो रुप’ या म्यूजिक भिडियो सार्वजनिक जूगु खः । म्येया दक्वं छायाङ्कन काश्मिरय् जूगु खः ।
म्यूजिक भिडियो ख्वपया च्वछें काश्मिर थ्यंम्ह शेरसिंह व वया पुर्वजन्मया मतिनामि शहनाजया अतृप्त आत्माया मतिनया बाखनय् आधारीत जुयाः दयेकातःगु दु ।
‘थ्व म्यूजिक भिडियोयात काश्मिरया प्राकृतिक सुन्दरतालिसें स्वये न्ह्यइपुइगु कथंया जक दयेकेत स्वयागु दु । काश्मिरया प्राकृतिक सुन्दरतायात छपु बाखनय् चिनाबियागु जक खः’ म्यूजिक भिडियोया निर्देशक राजेश हाडां धयादिल ।
२०५२ सालय् ‘दि गोल्डन गेट’ नांया म्यूजिक एलबमय् रिलिज जूगु म्येयात रि एरेन्ज व रि रीकर्डिङ यानाः म्यूजिक भिडियोया रुपं सार्वजनिक याःगु खः ।
‘२०५२ सालय् ४ ट्र्याकया रेकर्डिङ मेसीनय् रेकर्ड यानागु म्येयात आः अकस्टिक बाजंत हे छ्यलाः न्हूकथं री एरेन्ज व रेकर्डिङ यानागु दु । म्यूजिक भिडियो नं भचा न्हू सवाः बी धकाः काश्मिरय् वनाः दयेकागु खः’ संगीतकार राजेशं धयादिल ।
म्यूजिक भिडियोलय् म्येया संगीतकार, संगीत संयोजक, म्यूजिक भिडियो निर्देशक व दृश्य सम्पादक राजेश हाडालिसें कलाकार रन्जना सितिखुं अभिनय यानादीगु दु ।
छायाङ्कन यश हाडां याःगु दु । म्ये हरिहर तिमिल्सिनां च्वयादीगु दु ।
म्यूजिक भिडियो हाडा ब्रदर्श युट्युब च्यानलय् सार्वजनिक जूगु दु ।