थुगुसीया मातृभाषा राष्ट्रिय सेवा सिरपाः जनकवि दुर्गालाल श्रेष्ठयात बीगु जूगु दु । आदिवासी जनजाति उत्थान राष्ट्रिय प्रतिष्ठानं दँयदसं बियावःगु सिरपाः २०८० सालया नितिं जनकवि श्रेष्ठयात बीत्यंगु खः ।

अन्तर्राष्ट्रिय मातृभाषा दिवसया दिं लाकाः वइगु फेब्रुअरी २१ (फागुन ९) कुन्हु श्रेष्ठयात उगु सिरपाः लःल्हायेत्यंगु दु । व दिनय् छगू ज्याझ्वः यासें संघीय मामिला तथा सामान्य प्रशासन मन्त्री अनिता देवीं श्रेष्ठयात सिरपाः लःल्हाइगु धाःगु दु ।

‘श्रेष्ठं नेपाली साहित्य व मांभाय् (नेपालभाषा) साहित्यया उत्थान व विकासय् बियादीगु अतुलनीय, अथक व अनवरत योगदानया उच्च मूल्याङ्कन यासें थ्व सम्मान बीत्यनागु खः’ प्रतिष्ठानपाखें पिथंगु पत्रय् धयातःगु दु ।

सिरपाः छगू लख राशीयागु खः ।

थ्वयां न्ह्यः थुगु सिरपाः साहित्यकार तिलक विक्रम नेम्वाङ व शताब्दी पुरुष वरिष्ठ संस्कृतिविद् डा. सत्यमोहन जोशीयात लःल्हाःगु खः ।