न्हूदँ नेपाल सम्वत ११४७ सतिना वयाच्वंगु थौंया दिनय् जन मानसय् न्हूदँया उत्साह व उमङ्ग नं उलि हे अप्वया वयाच्वंगु खनेदु ।

विशेष यानां येँ, यल व ख्वपय् न्हूदँ नेपाल सम्वत ११४७ यात लसकुस यायेत थीथी ज्याझ्वःया ग्वसाः ग्वयाच्वंगु दु । थ्व हे झ्वलय् न्हूदँ समारोह समिति ११४७ व नेपालभाषा मंकाः खल यलं यलय् जुइगु न्हूदँया ज्याझ्वःत सार्वजनिक याःगु दु ।

समितिं पितब्यूगु ज्याझ्वः धलः कथं वइगु कौलागा एकादशी (कार्तिक १९) बिहिबाःया दिनस न्याक्वःगु राष्ट्रब्यापि बुद्धिचाल धेंधें बल्लाः कासा जुइगु जूगु दु । ललितपुर स्पोर्ट्स क्लबलिसेया मंकाः ग्वसालय् जुइत्यंगु थुगु धेंधें बल्लाः कासा मंकाः खलः दबूछेँय् जुइत्यंगु दु ।

अथेहे, कौलागा द्वादशी (कार्तिक २०) शुक्रबाःकुन्हु यल महानगरपालिका १६ वडा कलाकार समितिलिसेया मंकाः ग्वसालय् भन्दाः क्यब मंगलय् भिन्तुना कालबिललिसें सांस्कृतिक ज्याझ्वः जुइगु जूगु दु ।

वयां कन्हयकुन्हु कौलागा त्रयोदशी (कार्तिक २१) शनिबाःया दिनय् धाःसा निगू ज्याझ्वःत जुइ ।

अक्षयश्वर परम्परागत बौद्धकला महाविद्यालयलिसेया मंकाः ग्वसालय् मंगःस्थित महारानी पुखुलिइ मन्दः च्वज्या धेंधें बल्लाः कासा जुइ ।

अथेहे, सोलुसन समाजलिसेया मंकाः ग्वसालय् मंकाः खलः दबू छेँय् हिदान, मिखादान, छ्यंगूदानया नापं मिखा, चिनील्वयलिसें स्वास्थ्य जाँचया ज्याझ्वः तयातःगु दु ।

कौलागा आमाइ (कार्तिक २३) सोमबाःया दिनस नं निगू ज्याझ्वःत जुइ । थ्व दिनय् १० किलोमिटरया ब्वाज्या धेंधें बल्लाः कासा जुइ ।

अथेहे, रोट्र्याक्ट क्लब अफ ललितपुरलिसेया मंकाः ग्वसालय् सनिलय् कात्ति दबुलिं सीमतयाः (Candle Walk) न्ह्याइ ।

नेपाल सम्वत ११४७ कछलाथ्व पारु (कार्तिक २४) मंगलबाःकुन्हु धाःसा तःजिक थीथी ज्याझ्वः यानां न्हूदँयात लसकुस याइगु जूगु दु ।

न्हूदँया दिनय् डब्लुसिसिएनलिसेया मंकाः ग्वसालय् सुथय् मंकाः खलः यलं ३० किलोमिटरया भिंतुना साइकल र्याली न्ह्याइ ।

अथेहे, नसंचा उलेज्याझ्वः धुंकाः मंगलय् न्हूदँया तःजिगु समारोह जुइ ।

अथेहे, न्याक्वःगु सत्यमोहन जोशी नेपालभाषा साहित्य सिरपाः ११४७ लःल्हायेगु ज्या नं जुइसा सनिलय् मंकाः खलः दबूछेँय् दीप प्रज्वलनया ज्याझ्वः दु ।

वया नापं नेवाः पात्रो, स्वन्ति नखः व न्हूदँ ११४७ या जानकारी बीगु ज्याझ्वः नं तयातःगु दु ।

समितिं सकसित ज्याझ्वलय् ब्वति कयाः सकलें जानां न्हूदँयात तःजिक लसकुस यायेत आह्वान याःगु दु ।