थुगुसीया नेपाल इन्टरनेशनल फिल्म फेस्टीभल (निफ)य् आनी छोइङ डोल्माया जीवनी अधारित डकुमेन्ट्री ‘आनी छोइङ डोल्माः नथिङ इम्पोसिबल’ ओपनिङ फिल्म जुइगु जूगु दु ।

फेस्टिभलया नायः केपी पाठकं जानकारी ब्यूकथं जेनिफर लिन व सान बाईं निर्देशन याःगु थ्व डकुमेन्ट्री महोत्सवयागु उद्घाटननापं दकले न्हापां क्यनीगु फिल्म जूगु खः ।

आनीयागु सांगीतिक यात्रा, भिक्षु जीवन व समाजसेवायात डकुमेन्ट्रीं न्ह्यब्वइगु धाःगु दु । तर निर्देशक लिनं थःगु अन्तरवार्ताया झ्वलय् आनीया स्वतन्त्रताया मालेज्याय् थ्व डकुमेन्ट्री केन्द्रित जुइगु धयादिल ।

हङकङया सिटी युनिभर्सिटीइ आम सञ्चारया प्राध्यापक लिनं आनीलिसे न्हयदँ नापनापं जुयाः थ्व डकुमेन्ट्री तयार यानागु धयादिल ।

‘सन् २०१० य् गरिबीइ ब्वलंम्ह मचाया शिक्षाया नितिं आनीं स्थापना याःगु आर्यतारा ब्वनेकुथियागु भ्रमण धुंकाः डकुमेन्ट्री दयेकेगु बिचाः वःगु खः । थुकिया न्यादँ लिपा डकुमेन्ट्री निर्माणया ज्या न्ह्याकागु खः’ लिं धयादिल ।

थ्व हे डकुमेन्ट्रीं थगुने वार्सा इन्टरनेसनल फिल्म फेस्टिभलय् एसियन प्यासिफिक अडियन्स अवार्ड व नेटप्याक अवार्ड त्याकूगु खः ।

निफय् नं थ्व डकुमेन्ट्री माउन्ट एभरेस्ट अवार्डया नितिं धेंधें बल्लाखय् दु । थ्व विधाय् देश विदेशया १३गू डकुमेन्ट्री धेंधें बल्लाखय् दु । त्याकामि संकिपां द्वःछि डलर तका राशिया माउन्ट एभरेस्ट अवार्ड ल्हातय् लाकी ।

चैत १ निसें ५ गतेतक जुइगु संकिपा महोत्सवय् थुगुसी ४० देयया ८८ संकिपा प्रदर्शन जुइ । धेंधें बल्लाखय् दुगु संकिपाया क्यनेज्या नापं महोत्सव ज्वःछि संकिपा निर्माणया थीथी विधानापं सम्वन्धित कार्यशाला, सहलह व अन्तर्क्रिया ज्याझ्वः नं जुइगु ग्वसाः खलकं धाःगु दु ।

महोत्सवया संकिपात क्यूएफएक्स सिनेमाया कचात सिभिल मल, लबिम मल, ख्वप व छायाँ सेन्टरया हलय् प्रदर्शन जुइ ।