येँ महानगरपालिका (येँमपा) दुने सार्वजनिक थासय् अंगः चित्र च्वइगु जूगु दु । थुकिया लागिं महानगरपालिकाया सार्वजनिक निर्माण विभाग व ललितकला प्रज्ञा प्रतिष्ठान दथुइ सम्झौता जूगु दु ।

विभागया प्रमुख सुरज शाक्य व प्रतिष्ठानया उप–प्रशासन प्रमुख कमलमणि काफ्लें सम्झौता पतिइ ल्हाःचिं तयादीगु दु ।

सम्झौता कथं स्वीकृत जूगु डिजाइन व थासय् प्रतिष्ठानं अंगः चित्र च्वइ । थ्व ज्या २०८१ जेठ मसान्त तक्कय् क्वचायेकेगु धाःगु दु ।

अंगः चित्र दयेकेत प्रतिष्ठानं थाय् व क्षेत्रफललिसेंया कार्ययोजना न्ह्यब्वइ सा स्वीकृत कार्ययोजनाया लिंधसाय् ज्इा जुइगु येँमपां न्ह्यथंगु दु ।

थुकिया लागिं महानगरपालिकां ५० लख तका उपलब्ध याकी । सम्झौता धुंकाः ६० प्रतिशत अर्थात ३० लख तका व ज्या क्वचायेकाः ४० प्रतिशत अर्थात २० लख तका बीगु सम्झौताय् धयातःगु दु ।

विभागया कथं न्हापांगु चरणय् माइतीघरं बबरमहल वनेगु लँय् जवपाखेया अंगः, प्रदर्शनी मार्गया अंगः, अन्तरराष्ट्रिय बिमानस्थल पिने, बानेश्वर मीनभवन, लैनचौर समाज कल्याण परिषदया अंगः चित्र च्वयेत स्वीकृत जूगु दु ।