येँ महानगरपालिकाय् प्रमुख प्रशासकीय अधिकृत विभागीय प्रमुखतलिसे न्हिं न्हिं प्रगति वैठक च्वनीगु जूगु दु ।

येँमपाया प्रमुख प्रशासकिय अधिकृत प्रदीप परियारं न्हि न्हि सुथय् ९ः४५ताः इलय् विभागीय प्रमुखतलिसे प्रगति बैठक च्वनेगु ज्याधलः दयेकादीगु खः ।

विभाग स्तरय् वंगु न्हिया अद्यावधिक, वकुन्हुया तयारी, उकिया नितिं आन्तरिक समन्वय व प्रगतिया बारे सीकेत थ्व कथंया ज्याधलः दयेकागु प्रमुख प्रशासकिय अधिकृत परियारं जानकारी बियादिल ।

‘बैठक दुगु हे हुनिं ज्या वा सेवा प्रवाहय् पंगः जुइमखु । बैठकयात औपचारिकताय् स्वयां विषय केन्द्रीत यायेगु जुइ’ परियारं धयादिल ।

परियारयागु हे ज्याकुथिइ थौं च्वंगु आर्थिक दँ २०७९र०८० या महालेखापरीक्षकया अन्तिम लेखापरीक्षण, प्रारम्भिक प्रतिवेदनं न्ह्यथंगु अवस्थाया बारे विभागीय प्रमुखतलिसे सहलह यासें योजना न्यंकादीगु खः ।

प्रतिवेदनं न्ह्यथंगु ‘सैद्धान्तिक’ व ‘ लगती’ वेरुजुलिसे स्वापु दुगु विभाग, आयोजना, एकाइ, सचिवालय व ज्याझ्वःया प्रमुखतय्‌सं प्रारम्भिक बेरुजुयात रुजु याकेत यायेमाःगु ज्या व निर्वाह यायेमाःगु भूमिका सहलहया मू विषय जूगु खः ।

बैठकय् वित्त विभागया प्रमुख डा। शिवराज अधिकारीं प्रारम्भिक प्रतिवेदनया विषय न्ह्यब्वयादीगु खः ।

अथेहे आन्तरिक लेखा परीक्षण एकाइया प्रमुख यादव घिमिरें विषयलिसे सम्बन्धित न्हापा यानागु ज्याया विषयय् जानकारी बियादिल ।

बैठकय् प्रमुख प्रशासकीय अधिकृत परियारं थौँतकय् वडातय्‌सं प्राप्त याःगु वित्तीय प्रगति प्रस्तुत यानादिल ।

परियारया कथं उच्चतम प्रगति याःगु वडाया वित्तीय प्रगति ४७।५ प्रतिशत व दकले म्ह्वः प्रगति याःगुलिइ ९।८ प्रतिशत दु ।