ज्यापु समाज यलं थुगुसी नं होलिया लसताय् ‘वृहत फागु पुन्हि’ ज्याझ्वःयात निरन्तरता बीगु जूगु दु ।

यलया ज्यापु समुदायया कुसा संगठन ज्यापु समाजं वइगु चैत्र ११ गते आइतबाःया दिनय् ज्याझ्वः यायेत्यंगु खः ।

थीथी सांस्कृतिक झाँकीलिसें मंगलबजारं न्ह्यानाः नगर परिक्रमा याइगु ज्याझ्वः यलया भिंद्यःलाछि थ्यंकाः क्वचाइगु समाजं न्ह्यथंगु दु ।

थ्वयां न्ह्यः, मंगलबजारय् जुइगु ज्याझ्वलय् ज्याझ्वःया औपचारिक उलेज्या जुइगु ज्याझ्वः कजि दिनेश महर्जनं जानकारी बियादिल ।

‘मंगलबजारया कात्ति दबुलिइ छगू औपचारिक ज्याझ्वःया दथुइ ‘बृहत फागु पुन्हि’ ज्याझ्वःया उलेज्या जुइ । संस्कृति पर्यटन तथा नागरिक उड्डयन मन्त्री हित बहादुर तामाङ्गपाखें ज्याझ्वःया औपचारिक उलेज्या जुइगु ज्याझ्वः दु’ कजि महर्जनं जानकारी बियादिल ।

मंगलबजारय् करीब बाघौया औपचारिक ज्याझ्वः जुइगु व वयां लिपा सांस्कृतिक झाँकीलिसें होलि म्हिताः नगर परिक्रमा याइगु धाःगु दु ।

ज्यापु समाजया कलाकारतपाखें सांस्कृतिक न्ह्यब्वया न्ह्यब्वइगु महर्जनं धयादिल ।

‘साँस्कृतिक झाँकीलिसें ¥यालीं नगर परिक्रमा यायबलय् ज्यापु समाजया हे सछि स्वयां अप्वः कलाकारतपाखें हुलाप्याखं, धिमेय, व म्ये न्ह्यब्वयेगु ज्याझ्वः दु’ महर्जनं धयादिल ।

ज्याझ्वलय् करीब द्वःछि मनूतय् ब्वति दइगु व उकी करीब सछिम्ह विदेशी पर्यटकतयगु नं ब्वति दइगु समाजं धाःगु दु ।