चलचित्र पत्रकार संघ नेपालया तत्वावधानय् प्यन्हुया न्हापांगु राष्ट्रिय मुना हेटौँडाय् क्वचाःगु दु ।

फागुन ५ गतेनिसें ८ गतेतक जूगु मुना वंगु ८ गते बागमति प्रदेशया मुख्य मन्त्री शालिकराम जमकटेलया उपस्थितीइ छगू ज्याझ्वः यासें क्वचायेकल ।

स्थापनाया २५ दँ पूवंगु लसताय् संघं ज्याझ्वः याःगु खः ।

मुनाय् सिनेमा व पर्यटनया थीथी विषयस ११ सेसनय् अन्तरसंवाद जूगु संघया नायः समीर बलामीं जानकारी बियादिल ।

सिनेमा पर्यटनया आधार न्ह्यब्वसें संघं राष्ट्रिय मुनाय् सिनेमा संवाद, अन्तरक्रिया, कार्यशाला, गोष्ठी, कार्यपत्र प्रस्तुतिलिसेंया थीथी ज्याझ्वः याःगु खः ।

समारोहस संघया पुलांम्ह नायः विदुर गिरीं ‘आःया संकिपा पत्रकारिता’ विषयस अन्तरसंवादया सहजीकरण यानादीगु खः ।

उगु अन्तरसंवादय् सन्चारकःमित शान्तिप्रिय, दिनेश डि.सि., जयन सुब्बा मानन्धर, विजयरत्न तुलाधर व बागमति प्रदेशया सन्चार रजिष्ट्रार रेवति सापकोटाया ब्वति दुगु खः ।

मुनाया लिपांगु दिनय् संघं मुनाय् न्ह्यब्वःगु विषयत कःघानाः संघया हेटौंडा घोषणा पत्र जारी याःगु खः । घोषणा पत्रमार्फत संघं १३ मागत स्वंगुलिं तहया सरकारयात तःगु दु ।

व झ्वलय् संघं भीमफेदी कुलेखानी सुरुङ मार्ग दयेकाः हेटौँडालिसें मुक्कं मकवानपुरयात फिल्म हबया रुपं विकास यायेमाःगु, केन्द्रीय प्रदेश व स्थानीय सरकारं स्थानीय पर्यटकीय थायया पर्यटन प्रवर्ध्दनया लागिं सिनेमा पर्यटनय् बः बियाः थीथी ज्याझ्वः दयेकेमाःगु, प्रदेश व स्थानीय तहया सरकारं हेटौँडा व जःखःया क्षेत्र व मकवानपुरया चित्लाङ, कुलेखानी, दामन, थाहा, मकवानपुरगढीलिसेंया थासय् सिनेमा पर्यटनयात बः बियाः माःगु पुर्वाधार दयेकेमाःगुलिसेंया माग न्ह्यब्वःगु खः ।

संघया सल्लाहकार डब्बु क्षेत्रीया कजिसुइ सुरक्षा भट्टराई, जीवन पराजुली, कपिल खड्का व श्रीराम अर्जुन दुजः दुगु समितिं घोषणा पत्र तयार याःगु खः ।