येँया जय बागेश्वरीइ थौं शनिबाः परम्परागत बाद्यवादनया मंकाः न्ह्यब्वया ज्याझ्वः ‘ग्वल अर्केष्ट्रा’ जूगु दु । येँ महानगरपालिका व ग्वल बाजं खलकं मंकाः कथं ज्याझ्वःया ग्वसाः ग्वःगु खः ।

अर्केष्ट्राय् महानगरपालिकाया पूर्वी क्षेत्रया खुगू वडा (वडा नं. १, ५, ६, ७, ८ र ३०) या परम्परागत बाद्य पुचलं थीथी बाजंया न्ह्यब्वया न्ह्यब्वःगु खः ।

पुचलं सामाजिक, धार्मिक ज्याझ्वलय् थाइगु धिमय् (तग्वःगु/चिग्वःगु), पछिमा, खिं, क्वंचाखिं, नायःखिं, धाः, मगःखिं, प्वङ्गा, बाँसुरीलिसेंया बाजंया न्ह्यब्वया न्ह्यब्वःगु खः ।

अथेहे, भुस्याः, छुस्या, ताः, बबैचा, चिम्टा, घाङ्गल लिसेंया थीथी बाजंया नं थीथी बोल, धुन व ताल न्ह्यब्वःगु खः । ज्याझ्वलय् थौकन्हय् लोकं ह्वानाच्वंगु थीथी म्येया धुन नं थाःगु खः ।

ज्याझ्वलय् नुगःखँ तयेगु झ्वलय् महानगरपालिका उपप्रमुख सुनिता डंगोलं परम्परागत बाद्यबादनय् ल्याय्म्ह पुस्ता आकर्षित यायेत व पुस्तान्तरण यायेत वडां न्ह्याकूगु कुतःया प्रशंसा यानादिल ।

‘थ्व ज्या हरेक वडाय् विस्तार जुयावनीगु आशा कयागु दु । थुकिं अमूर्त सांस्कृतिक सम्पदाया संरक्षण व प्रवर्ध्दनय् तिबः व पर्यटन प्रवर्ध्दनया लागिं योगदान जुइ’ ज्याझ्वः कजि, वडा ८ या अध्यक्ष लिसें सम्पदा तथा पर्यटन समितिया कजि आशामान संगतं धयादिल ।

ग्वल क्षेत्रय् ९ पुखू, ९ ल्वहंहिति, ९ तुं, ९ ध्वाखा, ९ शक्तिपीठ, ९ फल्चा, ९ दबू, ९ त्वाः व ९ जात दु । अर्केष्ट्रा बादन थ्व हे सम्पदालिसे सम्बन्धित खः ।

बाद्यवादनलिसें ज्याझ्वलय् श्री गुरु नित्यनाथ बाजं खलः, नरः थतुत्वाः नासः खलः व ग्वल बाजं खलकं परम्परागत हुलाप्याखं न्ह्यब्वःगु खः ।