चन्द्रागिरि नगरपालिकां स्वन्हुया वन डढेला रोकथाम अले नियन्त्रण तालिम जूगु दु ।

चन्द्रागिरि नगरपालिकां अमेरिकी अन्तराष्ट्रिय विकास नियोग (युएसआइडी) या आर्थिक अले प्राविधिक ग्वहालिइ न्ह्यानाच्वंगु स्वच्छ हावा ज्याझ्वः अन्तर्गत तालिम न्ह्याःगु खः ।

तालिमय् डढेलो नियन्त्रण यायेगु तरिका व ध्यान बीमाःगु खँ जानकारी याकीगु नगरपालिकां न्ह्यथंगु दु ।

नगरप्रमुख घनश्याम गिरीं तालिमया शुभारम्भ यासें नगरपालिकां विपद् जोखिम व्यवस्थापनय् उच्च प्राथमिकतालिसें योजना, जनशक्ति व बजेट स्वंगुलिं क्षेत्रय् ध्यान बियागु धयादिल ।

व झ्वलय् नगर प्रमुख गिरीं विपद् व्यवस्थापनया पूर्व तयारीया लागिं चन्द्रागिरी नगरपालिकाया १५गुलिं वडाय् माःगु हलंज्वलंया व्यवस्थापन यायेत्यनागु धयादिल ।

ज्याझ्वलय् उपप्रमुख बसन्ती श्रेष्ठ, प्रमुख प्रशासकीय अधिकृत हेमराज अर्याल, नगरप्रवक्ता कृष्ण प्रसाद खड्गी, वातावरण तथा विपद् व्यवस्थापन समितिका संयोजक सञ्जय सिग्देल लिसेंया उपस्थिती दुगु खः ।

उद्घाटन सत्रया सहजीकरण वातावरण तथा विपद् व्यवस्थापन शाखाया प्रमुख भद्रा अर्यालं याःगु खः ।

नगरपालिका दुने आः २३ वन उपभोक्ता पुचः क्रियाशील दु ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणया कथं मानवीय लापरवाहीया हुनिं नेपालय् ६४ प्रतिशत स्वयां अप्वः डढेलोया घटना जुइगु याः ।

मनूतयसं कृषि कर्म म्ह्वः यानायंकूगु हुनिं जङ्गलय् सिँ, घाँय् आदि मुनाः च्वनाच्वंगु व अथे मुनाच्वंगु ‘फ्युल’ च्याइलबय् तःधंगु क्षेत्रय् डढेलो जुइगु खतरा अप्वःगु विज्ञतय् धापू दु ।

जल तथा मौसम विज्ञान विभागं थुगुसीया चिकुलाय् सरदर स्वयां म्ह्वः वा वःगुलिं सुक्खा जूगु व सुक्खाय् डढेलोया जोखिम अप्वः जुइगु खतरा क्यनेधुंकूगु दु ।