सूर्यविनायक नगरपालिका वडा नम्वर १० चित्तपोलस्थित सिमल्टार बाँसुरी खलःया ग्वसालय् जूगु बाँसुरी प्रशिक्षण क्वचाःगु दु ।

बाँसुरी खलकं छगू ज्याझ्वः यासें प्रशिक्षार्थीतयत दसिपौ लःल्हानाः प्रशिक्षण ज्याझ्वःया औपचारिक समापन याःगु दु ।

ज्याझ्वलय् बाँसुरी व हार्मोनियम बाजनय् प्रशिक्षित जूपिन्त सूर्यविनायक नगरपालिकाया नगर प्रमुख वासुदेव थापा, सूर्यविनायक नगरपालिका वडा नम्वर १० या वडाध्यक्ष शिवराम राउतलिसें नं दसिपौ लःल्हानादिल ।

ज्याझ्वलय् न्ववासें नगर प्रमुख थापां स्थानीय कला संस्कृति ल्वःमंकलकि थःगु हे अस्तित्व न्हनावनीगु धासें कला संस्कृतिया विकास, विस्तार यायेत नगरपालिकां फक्व ग्वहालि यायेगु धयादिल ।

अथेहे, वडाध्यक्ष राउतं आः वडाया आज्जु धयागु हे कला, संस्कृति, परम्परा व रीतिरिवाजया संरक्षण व सम्वर्ध्दन यायेगु जूगुलिं आर्थिक ल्याखं यायेमाःगु ग्वहालि यायेत तयार दुगु धयादिल ।

बाँसुरी खलकं स्थानीय नेवाः समुदायय् थःगु कला संस्कृतिया रक्षा याये धासें न्ह्याकूगु प्रशिक्षणय् स्थानीय ३९म्हेसित बाँसुरी प्रशिक्षण ब्यूगु खः ।

प्रशिक्षणय् ११ दँनिसें ५३ दँतकयापिं सहभागीतय्त बाँसुरी प्रशिक्षण ब्यूगु खः ।

प्रशिक्षार्थीतयत प्रशिक्षक धर्म मुनिकारं प्रशिक्षण बियादीगु खः । उगु हे ज्याझ्वलय् प्रशिक्षक मुनिकारयात हंगु नं खः ।