निःशुल्क स्वास्थ्य शिविरय् मिखा जाँच जुइगु
eBukhan – ईबुखँ डेस्क, २०८० फाल्गुण २३, बुधबार वर्गीकृत समाज
यल महानगरपालिका (यमपा) १६ वडा ज्याकू व अरनिको समाजं मंकाः कथं ग्वसाः ग्वयावःगु स्वास्थ्य शिविरय् वइगु शनिबाः विशेष मिखा शिविर नं जुइत्यंगु दु ।
वइगु शनिबाः फागुन २६ गते यलया बुबहालय् जुइगु बृहत निःशुल्क स्वास्थ्य शिविरय् मिखा शिविर लिसें नुगः ल्वय् व चिकित्सकया परामर्शय् निःशुल्क इको जाँच नं जुइत्यंगु खः ।
शिविरय् डा. दिपंकर प्रजापति व डा. नग्मा श्रेष्ठं स्वास्थ्य जाँच यानादीगु यमपा १६ वडाया वडाध्यक्ष निर्मल रत्न शाक्यं धयादिल ।
वडाय् स्वास्थ्य सेवाय् सकसिगु पहुँच सहज जुइमा धकाः इलय् ब्यलय् थुकथंया स्वास्थ्य शिविर यानावयागु वडाध्यक्ष शाक्यया धापू खः ।
‘ईया अभाव, आर्थिक अभाव लिसें थीथी हुनिं विरामीं उपचार याये मखनाच्वंगु अवस्था जुइफु । थज्याःगु अवस्था सुनां स्वयाच्वने म्वाःलेमा व स्वास्थ्य सेवा अःपु हे सकसिनं कायेखनेमा धकाः शिविरया ग्वसाः ग्वयावयागु दु’ वडाध्यक्ष शाक्यं धयादिल ।
यमपा १६ वडा ज्याकू व अरनिको समाजं फागुन महिनानिसें प्रत्येक शनिबाः १६ वडा दुनेया थीथी थासय् निःशुक्ल स्वास्थ्य शिविर यानावःगु दु ।
थ्वयां न्ह्यः, मंगलबजार, नकबहि, नागबहालय् शिविर जुइधुंकल । थ्व पालय् शिविर बुबहालय् जुइत्यंगु दुसा चैत्र महिनाय् स्वथ व लिपांगु शिविर मंगलबजारय् जुइ ।
वंगु फागुन ५ गतेनिसें न्ह्याःगु शिविर चैत्र १० गते क्वचाइ ।
