बागमति प्रदेश सांसद शैलेन्द्र बज्राचार्यं आः याकनं हे बागमति प्रदेशय् नेपालभाषा व तामाङ भाय् कामकाजि भायया रुपय् छ्यलीगु धयादीगु दु । यलय् कन्फराक्टीभ मिडिया सोलुसनया ग्वसालय् जूगु छगू ज्याझ्वलय् वयकलं थथे धयादीगु खः ।

ज्याझ्वलय् सांसद बज्राचार्यं कन्फराक्टीभ हलया उलेज्या लिसें www.ebukhan.com या शुभारम्भ यानादीगु खः ।

कन्फराक्टीभ हल व ebukhan.com या उलेज्या यायेधुंकाः न्ववासें सांसद बज्राचार्यं प्रदेशय् भाय् सम्बन्धि विधेयक पारित जुइधुंकुगु व आः याकनं कार्यान्वयन जुइगु धयादिल ।

‘गणतन्त्र, लोकतन्त्रय् थ्व बिधेयक अःपुक पारित जूगु थें च्वनेफु तर थुकी यक्वसिगु ताःहाकःगु संघर्ष व योगदान दु । आः थुकियात कार्यान्वयनय् यंकेत स्थानीय समाज लिसें स्थानिय संचार माध्यमं नं भुमिका म्हिते आवश्यकता जुइ’ बज्राचार्यं धयादिल ।

आः स्थानीय नेपालभाषा प्रदेशया कामकाजि भाय् जुइगु अवस्थाय् नेपालभाषाया संचारमाध्यमतयसं नं व्यवसायिक रुपय् न्ह्याःवनेत स्पष्ट योजना दयेकेत इनाप यानादिल ।

ज्याझ्वलय् कन्फराक्टिभ मिडिया सोलुसनया नायः बिराजकाजि राजोपाध्यायं स्थानीय बिषयबस्तु ल्ह्वनेत व न्हूगु खोजीया नितिं कन्फराक्टिभ हलयात संवाद व अन्तरक्रियाया दबूया रुपय् बिकास यायेगु धयादिल ।

‘खुदँ न्ह्यःनिसें न्ह्याकाच्वनागु खय् भाषाया न्यूज पोर्टल samachardesk.com य् नं स्थानीय विषयवस्तु व मुद्दायात प्राथमिकता बियावयागुलिइ आः ईबुखँय् स्थानीय विषयवस्तु स्थानीय मांभासं हे सम्प्रेषण जुइ । थ्व निगू डिजिटल दबूया नापं कन्फराक्टिभ हल भौतिक रुपं मुनाः स्थानीय विषयबस्तुइ संवाद, अन्तरक्रियाया नितिं छ्यलेगु जुइ’ राजोपाध्यायं धयादिल ।

मूलधारया धयावःगु संचारमाध्यमया मिखाय् मलाःगु स्थानीय सः, स्थानीय मुद्दा व विषयवस्तु हे समाचारडेस्क व ईबुखँया मेन न्यूज जुइगु राजोपाध्यायया धापू खः ।

ईबुखँया सम्पादक बिशाल राजभण्डारीं स्थानीय मुद्दा, विषयवस्तुयात सशक्त ढंगं सम्प्रेषण यायेत स्थानीय समाजया सक्रिय ग्वहालिया नितिं इनाप यानादिल ।

‘थौं ईबुखँ न्ह्यात तिनि, थुकियात जिं धायेगु छुं हे मदुनि । झी सकलें जानाः थ्वयात न्ह्यःने यंके । झीगु सः, झीगु खँ झी हे जानाः सशक्त ढंगं ल्ह्वनेनु’ सम्पादक राजभण्डारीं धयादिल ।

कन्फराक्टिभ मिडिया सोलुसनं खुदँ न्ह्यःनिसें खय् भाषाया न्यूज पोर्टल samachardesk.com न्ह्याकावःगु दु, गुकी बिराजकाजी राजोपाध्याय सम्पादक खः ।

आः थुगु हे कम्पनीं नेपालभाषाया न्यूज पोर्टल ebukhan.com नं न्ह्याकूगु दु । थ्व न्यूज पोर्टलय् बिशाल राजभण्डारी सम्पादक खः ।