नेपाल राष्ट्रिय खड्गी समाज, जिल्ला समिति कास्कीइ बिकल शाहीयात न्हूम्ह नायः ल्यःगु दु । वंगु शन्चरबाः पोखराय् क्वचाःगु जिल्ला समितिया प्यंगूगु अधिवेशनं विकलया अध्यक्षताय् न्हूगु कार्य समिति ल्यःगु खः ।

अधिवेशनय् विकलया अध्यक्षताय् निर्विरोध निर्वाचित जूगु न्हूगु कार्य समितिइ निर्मल खड्गी, सेते शाही, जगत लाल शाही व आनन्द शाही न्वकू चयन जूगु दु ।

मूछ्याञ्जेया भाला बिजय शाहीयात वंबलय् श्याम शाही ल्यू मूछ्याञ्जे व आई लाल शाही छ्याञ्जे पदय् च्वनादीगु दु । अथेहे कृष्णलाल शाही दांभरि व सरिता साही ल्यू दांभरिइ चयन जुल ।

गुम्ह कार्य समिति दुजलय् यम बहादुर शाही, राज कुमार शाही, राममाया शाही, नुन कुमार शाही, कृष्ण खङ्गी, तिर्थमाया शाही, पूर्णसिं खड्गी, सानु शाही व बिष्णु कुमार खड्गी लाःगु दु ।

वयां न्ह्यः समाजया केन्द्रीय व जिल्ला समितिया पदाधिकारी, दुजःत, कास्कीया स्थानीय बुद्धिजिवी, समाजया प्रतिष्ठित ब्यक्तिपिनिगु उपस्थितीइ समितिया प्यक्वःगु अधिवेशनया उलेज्या जूगु खः ।

वहे झ्वलय् समाजया ज्याथः दुजःत, भेट्रान धावक आई लाल शाही, २०७७ सालनिसें २०७९ साल तकया एस.ई.ई उत्तीर्ण विद्यार्थीतय्‌त सम्मान नं याःगु खः ।

ज्याझ्वलय् समाजया केन्द्रीय न्वकू अरोज कुमार खड्गी, नेवाः खलः कास्कीया नायः अशोक पालिखे, पोखरा महानगरपालिका–१ या वडाध्यक्ष साहारा प्रधान, नेवाः देय् दबू कास्की जिल्ला नायः कुष्णमान तुसाजु, जलारी समाज कास्कीया नायः कान्छी जलारी लिसेंया उपस्थिती दुगु खः ।

ज्याझ्वलय् नायःखिं बाजंया लिसें लाखय् प्याखं व थीथी नेवाः प्याखं नं न्ह्यब्वःगु खः ।