थीथी इलय् तंगु २० दुईपाङग्रे सवारी साधन लुइकाः ट्राफिक प्रहरीं सम्बन्धित थुवाःयात लःल्हाःगु दु ।

मंगलबाः काठमाडौं उपत्यका ट्राफिक प्रहरी ज्याकुथिइ छगू ज्याझ्वःया दथुइ उगु सवारी ज्वलंत सम्वन्धित थुवाःयात लःल्हाःगु खः ।

ज्याकूया प्रवक्ता प्रहरी वरिष्ठ उपरीक्षक जीवन कुमार श्रेष्ठं १८ मोटरसाइकल व निगः स्कुटर सम्बन्धित थुवाःयात लःल्हानादिल ।

उपत्यका ट्राफिक प्रहरी ज्याकुथिइ वःगु निवेदनया लिधंसाय् मालावनेगु झ्वलय् उगु सवारी ज्वलंत थीथी थासं लुइकागु ट्राफिक प्रहरीं धाःगु दु ।

‘पेप्सीकोला, कपन, बौद्ध, गौशाला, सुन्धारा, माछापोखरी, स्वयम्भू, चापागाउँ, बुङ्गमतीलसेंया थासं तंगु सवारी ज्वलंत लुइकागु खः । छुं वास्तविक नम्बर प्लेटय् व छुं नक्कली नम्बर प्लेट तयातःगु अवस्थाय् लुल’ प्रहरी वरिष्ठ उपरीक्षक श्रेष्ठं धयादिल ।

ट्राफिक प्रहरीया कथं न्ह्यानाच्वंगु आर्थिक दँय् ट्राफिक प्रहरीं आःतक २८५ सवारी ज्वलं सम्बन्धित थुवाःयात लःल्हायेधुंकल ।

अवैध रूपं नेपाल दुहांवःगु १७ सवारी ज्वलं धाःसा भन्सार ज्याकुथिइ छ्वयागु प्रहरी वरिष्ठ उपरीक्षक श्रेष्ठं जानकारी बियादिल ।

न्ह्यानाच्वंगु आर्थिक दँया आःतकय् चोरीया २४ दुईपाङ्ग्रे सवारी ज्वलंलिसें संलग्न २९म्हेसित नं कारवाहीया लागिं थीथी प्रहरी परिसर व प्रहरी वृत्तय् छ्वःगु दु ।

सवारी ज्वलं चोरी जुइकेमबीगु लिसें तंकेमबीत सुरक्षित थासय् पार्किङ यायेगु, ह्वील लक, चेन लक, ह्यान्डिल लक, डिस्क लक, सुरक्षा साइरनलिसेंया थीथी सुरक्षा उपाय लीत टाफिक प्रहरीं इनाप याःगु दु ।